У нядзелю 25 сакавіка ў гарадзенскім Каложскім парку на Дзень Волі адбыліся святочны мітынг і канцэрт у гонар 100 гадоў БНР, якія сабралі больш за 500 чалавек з розных куткоў Гарадзенскай вобласці.

Прызначаная гарадскімі ўладамі прастора была падзелена на некалькі частак: сцэна, дзіцячая пляцоўка і зона гандлю ды харчавання.

Падчас мерапрыемства быў арганізаваны збор подпісаў за ўсталяванне памятнай шыльды на будынку, дзе працаваў урад Беларускай Народнай Рэспублікі, калі ён часова знаходзіўся ў Гродна.

На свята многія прыходзілі цэлымі сем’ямі.

Каб адзначыць сотую гадавіну незалежнасці нашай краіны, у Гродна выступілі HandMaid, Harotnica, Helios, Андрусь Такінданг і завяршыў канцэрт гарадзенскі гурт «Вочы».

Фота Раман Ваўчок