Што Табе прынясём, Хрысце, Які з’явіўся на зямлі як чалавек дзеля нас?
Кожнае з Тваіх стварэнняў падзяку Табе прыносіць:
ангелы — спеў, нябёсы — зорку,
мудрацы — дары, пастухі — цуд,
зямля — пячору, пустыня — яслі;
мы ж — Маці Дзеву.
Спрадвечны Божа, памілуй нас.

Сціхіра на «Господи, воззвах»
вячэрні свята Раства Хрыстовага

Паважаныя праваслаўныя вернікі Ваўкавышчыны!

Ад усёй душы віншуем вас з надыходзячым Нараджэннем Хрыстовым!

Велічны духоўны сэнс падзеі, якая адбылася ў Віфлееме шмат вякоў таму, застаецца актуальнай і ў нашы дні. Цуда нараджэння Ісуса Хрыста сімвалізуе перамогу вечных каштоўнасцей, якія так неабходны чалавецтву сёння.

Радаснае сямейнае свята, сагрэтае пачуццямі згоды і ўзаемнай павагі, дорыць мільёнам людзей надзею на шчаслівую будучыню. Ціхая Калядная ноч дапамагае забыць крыўды і спрыяе ўзнікненню шчырай міласэрнасці ў нашых сэрцах.

Тайна нараджэння немаўляці Ісуса – сімвал прадаўжэння жыцця. Яна натхняе кожнага хрысціяніна на добрыя ўчынкі і па-сапраўднаму патрэбныя справы.

Шаноўныя ваўкавычане, жадаем шчасця, поспехаў, дужага здароўя на ўвесь калядны перыяд і на цэлы год!